رح ابدأ أنا
.........
هالموقف صار معي من فترة ..
كنت قاعدة بغرفتي لحالي الساعة 3 ونص الفجر وقاعدة حبابة كتير عالنت ورااااااايقة وجنبي كاسة الشاي وكلو تمام التمام
من زيء عيني اليسار حسيت انو في حركة غريبة من تحت الباب .. :shock:
اطلّعت .. مالقيت شي
رجعت للنت :o
بعد لحظات رجعت حسيت في حركة .. اطلعت .. و اطلعت أكتر واكتر .. قلت اي والله :shock: ...
في شي عميتحرك !! :shock:
لسه ماكملت الجملة إلا شفتلكن ياه فات من تحت الباب عالغرفة ووقف بعيد عني شي مترين وصار يطلّع فيني
ويجئر فيني من فوق لتحت ..
أول شي فكرته هداك ...
( أكيد عرفتوه .. مابقدر اكتب اسمه مشان ما كوبس بالليل )
بعدين لقيته نط :shock: ... وراح على المكتبة يلي ورا الباب عمله فتله ورجع لمكانه
( لك العمى .. شو هاد ؟؟
)
وانا طبعا كنت صرت فوق الطاولة جنب الشباك ومن الرعبة صوتي ماعاد طلع
شو بدي اعمل ياربي ؟؟ شو بدي اعمل ؟؟ بدي حدا ينقذني ..
قلت مافي غيرها .. رح اتصل بالموبايل على أخي يجي ..
بس وين الموبايل ؟ ... عالطرف التاني من الغرفة
ومأحلاني وانا نازلة عالأرض وماشية جنب هالشي يلي ماكنت اعرف شو هو و جيب الموبايل
أمري لله ..
من المكتب اتعربشت عالمكتبة ومشيت عليها ونزلت من الطرف التاني واسناولت الموبايل من عالطاولة
ورديت رجعت نفس المشوار .. ( طلع مو بس هو بينط .. كمان أنا :oops: )
اتصل بأخي الزغير ماكان يرد .. ( ومن كل عقلي متأملة يرد .. هدا بالمدافع ومابيحس :roll: )
اتصلت بأخي الكبير .. التاني متل الأولاني .. عطاه هالصفة الوراثية بالسبات الشتوي
وأنا دموعي على عرض خدودي وعمبرجف وبلش نفسي يديئ ..
اطلعت لمصدر الخطر .. قام حس عليي وقرّب أكتر
وهون اكتشفت انو .......... ضفدع :shock: :shock: :shock:
لك يخرب بيت سنتك مين جابك لهون ؟؟؟؟؟ وازدادت الدموع وضربات القلب
رجعت اتصلت بأختي .. بس طلعت الخانوم قاعدة بالصالون وتاركة موبايلها عندي .. :evil:
قلت ياااااااااارب ..
وصرخت بأعلى صوتي ........... لك وينكوووووووووووووووون ؟؟؟؟؟؟؟
ماحدا رد
قلت والله لاتصل بالبيت وفيّق الكل ولو بدي آكل خنائة تاني يوم .. بس ماضل هيك بهالوضع
لأ والمصيبة كانو زايرين عنا جماعة جايين من السفر وعندن جهاز تلفون بغرفتن
( يعني في اتلة مو خنائة :lol: )
لسه مارن أول رنة إلا فاتت أختي بكل برودة ... شبكي ؟؟
بس لما شافتني فوق المكتب ودموعي عمتشر ووشي أصفر
قامت المضروبة سكرت الباب عليي :shock: وحاكتني من ورا الباب لانو عرفت أنو في إنّ بالغرفة
قلتلا في ضفدع تعو قيمووووه ...
أختي : لك بلا هبل هلأ .. قوليلي . ناموسة و لا دبانة ؟
أنا : والله والله ضفدع .. أو يمكن جرادة .. أو لأ ضفدع .. هو طويل معناتا جرادة ... بس نطتو خفيفة أكيد ضفدع ... أو .....
لك هلأ وقت سآلتك :evil: ؟؟؟؟ روحي جيبي أخوكي يجي لعندي بسرعة فرط قلبي
أختي : طيب طيب رايحة وطي صوتك هلأ بيفيقو الجماعة
عيب من واجب المضيف إكرام الضيف واحترام قيلولته و ....
أنا مقاطعةً : لك خلصيناااا هلأ مو وقت محاضرتك يبلاكي بنتفه !!!!!!! :evil:
راحت و غطت الخانوم 10 دقايق .. وانا رجليي ماعادو حملوني ..
جد اتمنيت يكون الشباك يلي ورايي بينفتح لحتى اوقف من برا
المهم ترتاح نفسيتي شوي ويلي زاد الطين بلة انو مابقدر شيل عيوني من عالضفدع مشان مايتخبى بشي مكان ويضيع
والتاني طلع جئر وقليل زوء .. انا إطّلع و هو يطلّع .. انا بحلق و هو يبحلق أكتر .. قلتلو بصوت واطي :
يبلاك بدعسة شحاطة ويبظو عيونك التنتين ... :evil:
قام اتحرك :shock: ... قلتلو آسفة آسفة مشان الله خليك هيك ماعاد عيدا
( لك حسيت حالي مجنونة وانا عمبحكي معه :oops: )
انفتح الباب وطل اخي براسه وعين بالطول وعين بالعرض ( أبصر كيف فاق معها :roll: )
حامل بإيده الـ بف باف .. وعميقلي : وينه ؟
ليكو ليكو ورا الباب مباشرة ... بس لشو البف باف يا مصيّف ؟؟
قام سكّر الباب :shock: ( لك شو هالعادة البايخة يلي فيهن ماكنت أعرف :evil: )
قلتلو بعيد عن الباب شوي .. لك فوووووووت لاتتركوني لحالي معه ببوس ايديكن ساعدوني بقاااا
فتح الباب واطلّع عالأرض بعدين فيني : لك عنجد طلع ضفدع !! لك منين إجى ؟
انا : هلأ مو وقت تحازيرك .. قيمو من غرفتي رح يوقف قلبي
أخي : كيف بدي قيمو ؟ بركي طلع مو ضفدع !!
انا : لك يلىىىىىىىىىىىىى ( وانا عمببكي طبعاً وجسمي كله عميرجف :( )
أختي : لك أنتي ليش مزعوجة ؟ مو يمكن يكون هدا نفسه الضفدع تبع قصة الأمير والضفدع ؟! 8)
وبلشو هنن الاتنين صهصلة وضحك و برادة .. وانا من رعبتي طلعت فوق الكايس تبع الجهاز
وعمببكي واترجاهن يطالعوه من هون ...
قال يعني زعلو عليي لما شافوني بهالحالة ودموعي عبّت الغرفة وبلش نفسي يديئ أكتر
و من كتر مااتعاطفو معي ........ ماعملو شي
عميفكرو منين إجى !! .. ( هنن شو هاممن ، برات الغرفة و ماحدا قدّن وشي حامل بف باف والتانية عصاية مقشة )
المهم بالأخير الزلمة الضفدع حس على حاله بالنهاية انو ضيف غير مرحب فيه قام طلع من مطرح ماإجى
واشتغل الركد برا بكريدور البيت الساعة 4 الفجر .. وجاب أخي سطل وحبسو فيه
وانا ماصدقت على الله نزلت من فوق كايس الجهاز نط وطبشت الباب وقفلته ( قال يعني اذا انقفل بيستحي مايفوت مرة تانية :lol: )
وبلشت زخ أخواتي ببهادل على برادتن ويلي عملوه وفاقو أهلي على صوتي و صوت طبش الباب بس ما اكلت نصيبي لأ !!
طلعو متل أخواتي .. وقفو حوالين المذكور اعلاه عميتحزروا منين إجى هالكركمّ :evil:
الحمد لله ضليت أسبوع السخونة بتروح و تجي وإلتهاب اللوز والكوابيس عمتلاحقني وشوفه بدو ياكلني وأخواتي ماتركو حدا إلا وحكوله كيف كان شكلي فوق الجهاز وعمبحكي متل الروبوت وقال شو ؟؟! خايفين لينزلو دموعي عالجهاز قوم اتكهرب :shock: ( قلبن عليي ولي عليهن :evil: ) ..
هدا غير انو كل يوم بسمعلي كم تعليق بايخ و ضحك من ورا لورا و كل مايطلع شي ضفدع بالتلفزيون يقولو هدا ضفدوع ريري :evil:
وهيك .. خلصت حكاية ريري مع الضفدع .. ان شاء الله ماحدا بينحط بهيك موقف .. :oops:
السلام عليكم